AN 05-14 රාජ වග්ගය

AN 05-14-01.
චක්කවත්තන සූත්‍රය

§ 1. “මහණෙනි,
අඞ්ග පසකින් යුක්තවූ දැනුමෙන් යුත් සක්විති රජ දැහැමින් සිය අණසක පවත්වයි.
(ධම්මේනේවා චක්කන් පවත්තිති: දස කුසලයනට අයත් වූ කුසල කර්ම මගින් එසේ කෙරේ.) අණසක මනුෂ්‍යවූ රුපයෙන් ඉන්නාවූ කිසිදු සත්වයෙකු ඔහු මනුෂ්‍යයෙකු වේවා අමනුෂ්‍යයෙකු වේවා, කිසිම ප්‍රාණියකු විසින් ඒ දැහැමි අණ සක වැළකිය නොහැකිවේ.

“කවර පසකින්ද යත්,
මහණෙනි, සක්විති රජ
(1) අර්ත්‍ථය (යහපත කුමක්දැයි අයහපත කුමක්දැයි) දන්නේ වේ,
(2) ප්‍රවේනි ධර්‍මය දන්නේ වේ,
(3) (දඬුවමෙහි වේවයි, කරවුවෙහි වේවයි), පමණ දන්නේ වේ,
(4) (රජ සැප විඳීමේ වේවයි, විනිසුරු කරනෙහි වේවායි,) සුදුසු හා නොසුදුසු කාලය කුමක්දැයි දන්නේ වේද,
(5) (සතර කුලයන් හි වැස්සන් ඒ ඒ කාරියට) සුදුසු හා නොසුදුසු බව දන්නේ වේ, යන පසිනි.

“මහණෙනි, මේ අඞ්ග පසකින් යුක්තවූ දැනීමෙන් සමන්විත වූ සක්විති රජ දැහැමින් අණසක පවත්වද්දී, ඒ අණසක මනුෂ්‍යවූ රුපයෙන් ඉන්නාවූ කිසිදු සත්වයෙකු ඔහු මනුෂ්‍යයෙකු වේවා අමනුෂ්‍යයෙකු වේවා, කිසිම ප්‍රාණියකු විසින් වැළකිය නොහැකිවේ.

§ (2) මහණෙනි, මෙපරිද්දෙන්ම පඤ්ච ධර්‍මයකින් යුක්තවූ, අර්‍හත් සම්‍යක් සම්බුද්‍ධවූ තථාගතයන් දැහැමින්ම නිරුත්තරවූ ධර්‍ම චක්‍රය පවත්වයි. ඒ ධර්‍ම චක්‍රය කිසිදු ශ්‍රමණයෙකු විසින් හෝ, කිසිදු බ්‍රාහ්මණයෙකු විසින් හෝ, කිසිදු දෙවියෙකු විසින් හෝ, මාරයෙකු විසින් හෝ, බ්‍රහ්මයෙකු විසින් හෝ, ලෝකයෙහි කිසිවෙකු විසිනුත් වැලැක්විය හැකි නොවේ.

“කවර පසක්ද යත්?
මහණෙනි, මේ ශාසනයෙහි අර්‍හත් සම්‍යක් සම්බුද්‍ධවූ තථාගතයන්
(1) අත්තනඟු :- (යහපත කුමක්දැයි අයහපත කුමක්දැයි) අර්ත්‍ථය දන්නේ වේ, [තමනට යහපත කුමක්දැයි , අනුනට යහපත කුමක්දැයි , තමනට සහ අනුනට යහපත කුමක්දැයි , මේ ජීවිතයට කුමක් යහපත් දැයි, මතු ජීවිතයනට කුමක් යහපත් දැයි]
(2) ධම්මඟු- ධර්‍මය දන්නේ වේ, [චතුර් ආර්ය සත්‍යයන]
(3) මාතරංගු :- පමණ දැනීම ඇත්තේ වේ, [සිවුපසය යනු චීවර, පිණ්ඩපාත, සේනාසන සහ බෙහෙත්, ගිලන්පස යන සතරයි. ඒ පිළිගැනීමේ පමණ දැනීම මාත්‍රාව දැනගත්තේ වේ, ]
(4) කාලංගු :- සුදුසු හා නොසුදුසු කාලය කුමක්දැයි දන්නේ වේද,[ හුදෙකලාව සිට ප්‍රතිපදාව පිරීමට කාලය, විදර්ශනා වඩමින් ධ්යානයනට එළඹ සිටීමට කාලය, ධර්ම දේශනා කිරීමට කාලයයි, චාරිකාවේ යාමට කාලය ලෙස සුදුසු කාලය දන්නේ වේ]
(5) පරිස්සංඟු :- පිරිස් දන්නේ වේ, යන පසිනි. [මේ ක්ෂත්‍රිය යන් ගහන ශ්‍රාවක පිරිසකි, මේ තවුස් දම් පුරන ශ්‍රමනයන් පිරිසකි යි දන්නේ වේ]

මහණෙනි, මෙපරිද්දෙන් පඤ්ච ධර්‍මයකින් යුක්තවූ, අර්‍හත් සම්‍යක් සම්බුද්‍ධවූතථාගතයන් දැහැමින්ම නිරුත්තරවූ ධර්‍ම චක්‍රය පවත්වයි. ඒ ධර්‍ම චක්‍රය කිසිදු ශ්‍රමණයෙකු විසින් හෝ, කිසිදු බ්‍රාහ්මණයෙකු විසින් හෝ, කිසිදු දෙවියෙකු විසින් හෝ, මාරයෙකු විසින් හෝ, බ්‍රහ්මයෙකු විසින් හෝ, ලෝකයෙහි කිසිවෙකු විසිනුත් වැලැක්විය හැකි නොවේ.

AN 05-14-02.
චක්කානුවත්තන සූත්‍රය

§ 1 “මහණෙනි,
අඞ්ග පසකින් යුක්තවූ සක්විති රජහුගේ වැඩිමහළු පුත්රයා පියා විසින් පවත්වන ලද අණසක දැහැමින් පියා අනුව පවත්වයි. ඒ අණසක මනුෂ්‍යවූ රුපයෙන් ඉන්නාවූ කිසිදු සත්වයෙකු ඔහු මනුෂ්‍යයෙකු වේවා අමනුෂ්‍යයෙකු වේවා, කිසිම ප්‍රාණියකු විසින් වැළකිය නොහැකිවේ.

§2. “කවර අඞ්ග පසකින්ද යත්?
මහණෙනි, මේ ලෝකයෙහි සක්විති රජහුගේ වැඩිමහළු පුත්‍රයා
(1) අර්ත්‍ථය (යහපත කුමක්දැයි අයහපත කුමක්දැයි) දන්නේ වේ,
(2) ප්‍රවේනි ධර්‍මය දන්නේ වේ,
(3) (දඬුවමෙහි වේවයි, කරවුවෙහි වේවයි), පමණ දන්නේ වේ,
(4) (රජ සැප විඳීමේ වේවයි, විනිසුරු කරනෙහි වේවායි,) සුදුසු හා නොසුදුසු කාලය කුමක්දැයි දන්නේ වේද,
(5) (සතර කුලයන් හි වැස්සන් ඒ ඒ කාරියට) සුදුසු හා නොසුදුසු බව දන්නේ වේ, යන පසිනි.

§ 3. “මහණෙනි,
මෙම අර්තඥ ධම්මඥ මාත්රාඥ,කාලාන්ඥ පාර්ශඥ දැනීම සතු අඞ්ග පසකින් යුක්තවූ සක්විති රජහුගේ වැඩිමහළු පුත්‍රයා සිය පියා විසින් පවත්වන ලද අණසක දැහැමින්ම පියා අනුව පවත්වයි. ඒ අණසක මනුෂ්‍යවූ රුපයෙන් ඉන්නාවූ කිසිදු සත්වයෙකු ඔහු මනුෂ්‍යයෙකු වේවා අමනුෂ්‍යයෙකු වේවා, කිසිම ප්‍රාණියකු විසින් වැළකිය නොහැකිවේ

§4. “මහණෙනි, මෙපරිද්දෙන්ම කරුණු පසකින් යුක්තවූ, ශාරීපුත්‍රයන් තථාගතයන් විසින් පවත්වන ලද නිරුත්තරවූ ධර්‍ම චක්‍රය මනාකොටම ඒ අනුව පවත්වයි.
ඒ ධර්‍ම චක්‍රය කිසිදු ශ්‍රමණයෙකු විසින් හෝ, කිසිදු බ්‍රාහ්මණයෙකු විසින් හෝ, කිසිදු දෙවියෙකු විසින් හෝ, මාරයෙකු විසින් හෝ, බ්‍රහ්මයෙකු විසින් හෝ, ලෝකයෙහි කිසිවෙකු විසිනුත් වැලැක්විය නොහැකිවේ

“කවර පසකින්ද යත්? මහණෙනි,
මේ සාරිපුත්ත ස්තවිරයන්

(1) අත්තනඟු :- (යහපත කුමක්දැයි අයහපත කුමක්දැයි) අර්ත්‍ථය දන්නේය., [තමනට යහපත කුමක්දැයි , අනුනට යහපත කුමක්දැයි , තමනට සහ අනුනට යහපත කුමක්දැයි , මේ ජීවිතයට කුමක් යහපත් දැයි, මතු ජීවිතයනට කුමක් යහපත් දැයි]
(2) ධම්මඟු– ධර්‍මය දන්නේ වේ, [චතුර් ආර්ය සත්‍යය]
(3) මාතරංගු :- පමණ දැනීම ඇත්තේ වේ, [සිවුපසය යනු චීවර, පිණ්ඩපාත, සේනාසන සහ බෙහෙත්, ගිලන්පස යන සතරයි. ඒ පිළිගැනීමේ පමණ දැනීම මාත්‍රාව දැනගත්තේ වේ, ]
(4) කාලංගු :- සුදුසු හා නොසුදුසු කාලය කුමක්දැයි දන්නේ වේද,[ හුදෙකලාව සිට ප්‍රතිපදාව පිරීමට කාලය, විදර්ශනා වඩමින් ධ්යානයනට එළඹ සිටීමට කාලය, ධර්ම දේශනා කිරීමට කාලයයි, චාරිකාවේ යාමට කාලය ලෙස සුදුසු කාලය දන්නේ වේ]
(5) පරිස්සංඟු :- පිරිස් දන්නේ වේ, යන පසිනි. [මේ ක්ෂත්‍රිය යන් ගහන ශ්‍රාවක පිරිසකි, මේ තවුස් දම් පුරන ශ්‍රමනයන් පිරිසකි යි දන්නේ වේ]

ඒසාරිපුත්ත ස්ථවිරයන් පවත්වන්නාවූ ධර්‍ම චක්‍රය කිසිදු ශ්‍රමණයෙකු විසින් හෝ, කිසිදු බ්‍රාහ්මණයෙකු විසින් හෝ, කිසිදු දෙවියෙකු විසින් හෝ, මාරයෙකු විසින් හෝ, බ්‍රහ්මයෙකු විසින් හෝ, ලෝකයෙහි කිසිවෙකු විසිනුත් වැලැක්විය හැකි නොවේ

AN 05-14-03.
අරාජික චක්ක සූත්‍රය

§1. “මහණෙනි,
ධාර්මිකවූ, ධර්මයෙන් රාජ්‍ය කරන්නාවූ යම් සක්විති රජෙකු වේ ද, හෙතෙමේද ඔහුට වඩා ශ්‍රේෂ්ඨ වූ පාලකයෙකු ඔහුට ඉහලින් නොවේ නම් සිය අන සක පවත්වන්නට අසමත් වන්නේය.” යි වදාළ සේක.

§ 2. “මෙසේ වදාළ කල්හි එක් භික්‍ෂුවක් භාග්‍යවතුන් වහන්සේ ගෙන් මෙසේ ඇසීය.
“ස්වාමීනි, ධාර්මිකවූ, ධර්මරාජන්වූ සක්විති රජහට ඉහලින් කවරෙකු නම් නම් රජ වේද?”

“මහණ, ධර්මයයි” භාග්‍යවතුන් වහන්සේ වදාළ සේක.

§ 3 . “මහණ, මේ ලෝකයෙහි ධාර්මිකවූ, ධර්ම රාජයන්වූ සක්විති රජතුමෙක් ධර්මය අනුවම ධර්මයානුකුලව රජකම් කරන්නේ යැයි දැන ධර්මයට සත්කාර කරන්නේ, ධර්මයට ගෞරව කරන්නේ, ධර්මයට පුදන්නේ, ධර්මය ධ්වජ කොට ඇත්තේ, ධර්මය කෙහෙළි කොට ඇත්තේ, ධර්මය අධිපති කොට ඇත්තේ, සිය රාජ්‍ය මණ්ඩලයේ ඉන්නවුන් ට ආරක්ෂාව සලසයි. පිළිසරණය වෙයි.
…සිය පාලන මණ්ඩලයේ හා මන්ත්රිනට රැකවරණය සලසයි
…… සිය චතුරංග සේනාවේ අයටද…..
…… නියම් ගම් දනව් වැස්සන් ටද,
පැවිද්දන් හා ගෘහස්ත වාසින්ටද……
……ශ්‍රමණ බ්‍රහ්මනයන්ටද ………
……….. සත්ව ප්‍රජාව හා පක්ෂින්ටද ඉන්නවුන් ට ආරක්ෂාව සලසයි. පිළිසරණය වෙයි. ධාර්මිකවූ ආරක්‍ෂාවරණ ගෝපනය මොනවට විධාන කරයි.

§ 4 . “මහණ, මේ ධාර්මිකවූ, ධර්මරාජයානන්වූ, සක්විති රජ ධර්මයම නිසා රාජ්‍ය කරන්නේ ධර්මයට සත්කාර කරන්නේ, ධර්මයට ගෞරව කරන්නේ, ධර්මයට පුදන්නේ, ධර්මය ධ්වජ කොට ඇත්තේ, ධර්මය කෙහෙළි කොට ඇත්තේ, ධර්මය අධිපති කොට ඇත්තේ, ධාර්මිකවූ රක්‍ෂාවරණ ගෝපනය ඇතුළත ජනයා කෙරෙහි සංවිධානය කොට ධාර්මිකවූ රක්‍ෂාවරණ ගෝපනය ඇතුළත ජනයා කෙරෙහි ධාර්මිකවූ ආරක්‍ෂාවරණ ගෝපනය මොනවට විධාන කරයි. දැහැමින් අණසක පවත්වයි.

“ඒ අණසක මනුෂ්‍යවූ රුපයෙන් ඉන්නාවූ කිසිදු සත්වයෙකු ඔහු මනුෂ්‍යයෙකු වේවා අමනුෂ්‍යයෙකු වේවා, කිසිම ප්‍රාණියකු විසින් වැළකිය නොහැකිවේ”

§ 5 .“මහණ, නැවත අනිකක්ද කියමි.
අර්‍හත් සම්‍යක් සම්බුද්‍ධවූ, ධාර්මිකවූ, ධර්මරාජයාණන් වූ තථාගතයන් ධර්මයම නිසා ධර්මයට සත්කාර කරන්නේ, ධර්මයට ගෞරව කරන්නේ, ධර්මයට පුදන්නේ, ධර්මය ධ්වජ කොට ඇත්තේ, ධර්මය කෙහෙළි කොට ඇත්තේ, ධර්මය අධිපති කොට ඇත්තේ, ධාර්මිකවූ රක්‍ෂාවරණ ගෝපනය
“භික්‍ෂූන් කෙරෙහිද,
භික්‍ෂුණීන් කෙරෙහිද,
උපාසකයන් කෙරෙහිද,
උපාසිකාවන් කෙරෙහිද සංවිධාන කරයි.

  • “මෙබඳුවූ කාය කර්‍මයන් සේවනය කටයුතුය. මෙබඳුවූ කාය කර්‍මයන් සේවනය නොකටයුතුය.
  • මෙබඳුවූ වාක් කර්‍මයන් සේවනය කටයුතුය. මෙබඳුවූ වාක් කර්‍මයන් සේවනය නොකටයුතුය.
  • මෙබඳුවූ මනො කර්‍මයන් සේවනය කටයුතුය. මෙබඳුවූ මනො කර්‍මයන් සේවනය නොකටයුතුය.
  • මෙබඳුවූ ජීවිකාව සේවනය කටයුතුය. මෙබඳුවූ ජීවිකාව සේවනය නොකටයුතුය.
  • මෙබඳුවූ ගම් නියම්ගම් සේවනය කටයුතුය. මෙබඳුවූ ගම් නියම් ගම් සේවනය නොකටයුතුය”යි
    සතර පිරිසටම දේසනා කරන්නේ වේ.

§ 6 . “මහණ, අර්‍හත් සම්‍යක් සම්බුද්‍ධවූ, ධාර්මිකවූ, ධර්මරාජන්වූ තථාගතයන් ධර්මයම නිසා ධර්මයට සත්කාර කරන්නේ, ධර්මයට ගෞරව කරන්නේ, ධර්මයට පුදන්නේ, ධර්මය ධ්වජ කොට ඇත්තේ, ධර්මය කෙහෙළි කොට ඇත්තේ, ධර්මය අධිපති කොට ඇත්තේ, ධාර්මිකවූ රක්‍ෂාවරණ ගෝපනය භික්‍ෂූන් කෙරෙහිද, භික්‍ෂුණීන් කෙරෙහිද, උපාසකයන් කෙරෙහිද, උපාසිකාවන් කෙරෙහිද සංවිධාන කරයි. ධර්‍මයෙන්ම නිරුත්තරවූ ධර්‍මචක්‍රය පවත්වයි.

ඒ ධර්‍ම චක්‍රය ශ්‍රමණයෙකු විසින් හෝ, බ්‍රාහ්මණයෙකු විසින් හෝ, දෙවියෙකු විසින් හෝ, මාරයෙකු විසින් හෝ, බ්‍රහ්මයෙකු විසින් හෝ, ලෝකයෙහි කිසිවෙකු විසිනුත් පැවැත්විය හැකි නොවේ. “

AN 05-14-04.
සකවිජිත සූත්‍රය

§1. “මහණෙනි,
කරුණු පසකින් යුක්තවූ, අභිෂේක කළාවූ, ක්‍ෂත්‍රිය රජ යම් යම් දිශාවක වාසය කෙරේද, හෙතෙමේ කුමන තැනක වෙසෙසත් හේ ස්වකීයවූ විජිතයෙහිම වාසය කෙරෙයි.
“කවර පසකින්ද යත්,

  • “සිය මව් පසින්ද, පිය පසින්ද, යන දෙපසින් සත්වෙනි පියමුතු පරම්පරාව දක්වා පිරිසිදු වූ ක්ෂත්‍රිය ගෝත්‍රයෙන් පැවත එන්නේ වේද, මනාව උපන්නේ වේද, පිරිසිදු පිළිසිඳගැනීම් ඇත්තේද, අන් කුල ගෝත්‍ර බැහැර කරණ ලද්දේ, ජාතිවාදයෙන් නින්දා නොකරණ ලද්දේ වේද, [ මේ මතයන් හා විශ්වාසයන් මෙමෙ ධර්මය නිසා ඇති වූ ඒවා නොව ජම්බුද්වීපයේ වැසියන් බොහෝ කලක් විස්වාස කල මති මතාන්තර යන්ය.]
  • “ධන ධාන්‍යයෙන් ආට්‍යයවූයේ, මහත් සේ ධන සම්පත් ඇත්තේ, මහත් වූ සියලු සම්පත් ඇත්තේ, පිරුණාවූ භාණ්ඩාගාර කොටුගුල් ඇත්තේ වේද,
  • “ ඔහුගේ අණට කීකරුවූ ඔහුගේ කැමැත්තට නියෝගයට අනුව යන්නාවූ ඉතා බලවත්වූ චතුරංග සේනාවන් ඔහු හසුරුවන්නේ වේද,
  • “ඥාන වන්තවුද, අතීතයෙහි වූ දෙයින්ද දැන් වන්නාවූ දෙයින්ද අනාගතයෙහි විය හැකි දේ ගැන නිර්ණය කොට රජුට හා විජිතයට යහපත් වන්නාවූ කිරියා කරනු පිනිස ඔහුට උපදේස දීමට සමත් බුධිමත් පණ්ඩිතවූ, ව්‍යක්තවූ, නුවණ ඇත්තාවූ, පණ්ඩිතයන් ඔහුට වේද,
  • “ඔහුගේ මේ ධර්ම සතර නිසා සියලු තැන පැතිරෙන යහපත් කීර්ති ගෝශාව වේද

මේ පස් ධර්මයෙන් යුක්තවූ රජුන් , යම් යම් දිශාවෙක්හි වාසය කෙරේද, හේ ස්වකීයවූ විජිතයෙහිම වාසය කෙරෙයි.

§ 2. මෙලෙසම මහනෙනි, යම් භික්‍ෂුවක් යම් ගුණයන් පසකින් යුක්ත වේද, ඔහු කෙලෙස් නිවා විනිර්මුක්ත කොට විමුක්තියම පසක් කල මනසින් වාසය කරන්නේ වේ.
ඒ කිනම් ගුණ පසක් ද යත්:

  • “සීලය වඩන ලද්දේ පාතිමොක්ඛ සංවර සීලය අනුවම සංවර වන්නේ වේද,
    සුළුවුද වරදේ ආදීනවය දකින්නේ ,
    ශික්ෂාවෙන් සංවරව බ්‍රහ්මචරියාවේ නිමග්නවීම
    ක්ෂත්‍රි රජහුගේ මනාවූ උත්පත්තිය සේය.
  • බොහෝ සෙයින් ධර්මය ඉගෙන මනාසේ හදාරා,
    මුල මැද සහ අගද යහපත්වූ අර්ථ සහිත වූ ව්‍යංජන සහිත වූ ධර්මය,
    මනාසේ විමසමින් සිතින් පිරික්සමින් ඒ ධර්මයේම හැසිරෙයි.
    මේ වනාහි ක්ෂත්‍රිය රජහුගේ ධන ධාන්‍යයෙන් පිරුනාවූ භාණ්ඩාගාර වැනිය.
  • උපන් අකුශල ධර්‍මයන් දුරු කිරීම පිණිසද නුපන් අකුශල ධර්‍මයන් නොඉපිදවීම නුපන් කුශල ධර්‍මයන් පටන් ගන්නා ලද වීර්‍ය්‍යය ඇත්තේ, , නුපන් කුශල ධර්‍මයන් වැඩීම පිණිසද, ශක්ති ඇත්තේ, දැඩි උත්සාහ ඇත්තේ, කුශල ධර්මයන්හි බහා නොතබන ලද බර ඇතිව වාසය කෙරේද, ඒ අභිෂේක කරණ ලද්දාවූ ක්‍ෂත්‍රිය රජ ගේ සිවු රඟ සෙනග ගේ බලයන් මෙන්ය.
  • .“ප්‍රඥා ඇත්තේ, ආර්‍ය්‍යවූ, කෙලෙස් බිඳින්නාවූ, මනාකොට දුක් නැතිකිරීම පිණිස පවත්නාවූ, සියළු සංස්කාරයන්ගේ උත්පාද, ථිති භංග ඇතිවීම පැවතීම හා වැනසීම දක්නා ප්‍රඥාවෙන් යුක්තවේද, ඒ අභිෂේක කරණ ලද්දාවූ ක්‍ෂත්‍රිය රජුට බුද්ධිමත් ප්‍රඥාවෙන් මේරු පුරෝහිතයෙකු ඉන්නා සේය.
  • ‘ඔහුගේ මේ ධර්ම සතර විමුක්තිය මුහුකුරුවත්. හෙතෙම මේ විමුක්තිය නම් වූ පස්වෙනි ධර්මයෙන් යුක්තවූයේ යම් යම් දිශා වෙක්හි වාසය කෙරේද, කෙළෙසුන්ගෙන් මිදුනු සිත් ඇතිව වාසය කෙරෙයි.

ඊට හේතු කවරේද යත්, මහණෙනි,
කෙළෙසුන්ගෙන් මිදුනාවූ සිත් ඇත්තවුන්ට මෙසේ ම වේය” යි වදාළ සේක.

AN 05-14-05.
රජ්ජපත්‍ථනා සූත්‍රය

§ 1 .මහණෙනි, අභිෂේක කළාවූ, ක්‍ෂත්‍රිය රජහුගේ ජ්‍යෙෂ්ඨ පුත්‍රයා, රජ කම සඳහා මෙසේ ඇළුම් ඇත්තේ වේ., රාජාභිෂේකය පතන්නේ වෙයි.
ක්‍ෂත්‍රිය රජහුගේ ජ්‍යෙෂ්ඨ පුත්‍රයා:

  • “සිය මව් පසින්ද, පිය පසින්ද, යන දෙපසින් සත්වෙනි පියමුතු පරම්පරාව දක්වා පිරිසිදු වූ ක්ෂත්‍රිය ගෝත්‍රයෙන් පැවත එන්නේ වේද, මනාව උපන්නේ වේද, පිරිසිදු පිළිසිඳගැනීම් ඇත්තේද, අන් කුල ගෝත්‍ර බැහැර කරණ ලද්දේ, ජාතිවාදයෙන් නින්දා නොකරණ ලද්දේ වේද,
  • “මනා කඩවසම් රූපයකින් උත්තුංග දේහ විලාසයකින් හා තෙජසම්පන්න ඉරියා පැවැත්මෙන් හෙබියේ වේද,
  • නගරවලද ගම නියම ගම වලද වසනා ජනයාට එකසේ ප්‍රිය වේද,
  • පණ්ඩිත වුයේ, ව්‍යක්තවූයේ, නුවණැත්තේ, ඉකුත්වූ, පැමිණෙන්නාවූ, පවත්නාවූ අර්ත්‍ථයන් සිතන්ට සමර්ත්‍ත වෙත්ද
  • ඔටුන්න හිමි කුමරෙකු හදාළ යුතු කඩු ශිල්ප, ධනු ශිල්ප අශ්වාරෝහක ශිල්ප ආදී සියලු ශිල්ප හදාරා ඇත්ද

“ඔහුට මෙසේ කිරීටය ලබන්නට ආසාවක් කැමැත්තක් ඇතිවීම වන්නේය.

(1) මම මව් පසින්ද, පිය පසින්ද, යන දෙපසින් මනාව උපන්නේ වේ, පිරිසිදු පිළිසිඳගැනීම් ඇත්තේ වේ , සත්වෙනි පියමුතු පරම්පරාව දක්වා අමිශ්ර පෙළපතකින් පැවතෙන්නේ වේ. කුමක් හෙයින් මම රජ බැව් නොපතන්නෙම්ද’
(2) මම විශිෂ්ට රූ ඇත්තේ වෙමි, දැකුම් කටයුතු වූයේ, දුටුවන් ප්‍රසාද එලවන්නේ, උතුම්වූ වර්‍ණ සෞන්‍දර්‍ය්‍යයෙන් යුක්ත වෙමි, කුමක් හෙයින් මම රජ බැව් නොපතන්නෙම්ද
(3) මම මගේ දෙමාපියන්ට ප්‍රිය වන්නේ වෙමි. එසේ වූ මම ඔටුන්න නොපතන්නේ මන්ද?
(4) ගම් නියම් ගම් වල හා සියලු ප්‍රාන්තවල වසන රට වැස්සෝ මට ප්‍රිය වෙති මා ජනප්‍රිය වෙමි. සෙනගට ප්‍රියවූවෙක් මන වඩන්නෙක් වෙමි. කුමක් හෙයින් මම රජ බැව් නොපතන්නෙම්ද.
(5) ඔටුනු පැලඳීමට සුදුසු සේ පුහුණු කලයුතු සියලු යුද්ධ ශිල්ප ද ඇත් අස් ආදී ශිල්පද මනාසේ උගත් මම කුමක් හෙයින් මම රජ බැව් නොපතන්නෙම්දැයි යන පසිනි

මහණෙනි, අභිෂේක කළාවූ, ක්‍ෂත්‍රිය රජහුගේ ජ්‍යෙෂ්ඨ පුත්‍රයා රජ කම සඳහා මෙසේ ඇළුම් ඇත්තේ වේ.,

§ 2. එලෙසම මහණෙනි යම් ගුණාංග පහකින් යුක්ත වූ භික්ෂුව සියළු ක්ලේශ ප්‍රහාණය කොට ලබන විමුක්තිය ප්‍රාර්ථනා කරයි. කුමන ගුණාංග පසක් දැයි යත්,
(i) මහණෙනි, මේ ශාසනයෙහි භික්‍ෂුව , ශ්‍රද්ධාවෙන් සමන්විත වුයේ තථාගතයන් වහන්සේ ගේ බුද්ධත්වය ගැන අරහත්වය , දෙවියන්ට මිනිසුන්ට සාස්තෘ බව සම්පුර්ණ විශ්වාසයෙන් ඉන්නේද
(ii) මනා සෞක්ඛ්‍යයෙන් යුක්තවුයේ ඉතා කලාතුරකින් රෝග යන්ගෙන් ආබාධයන්ගෙන් යුක්තවුයේ භාවනා කිරීමට සුදුසු වඩා උණුසුම් නොවුද, ඉතා සීතල නොවුද ශරීර යක් ඇත්තේ ද,
(iii) “අවංකවුවේ වේද සටකපට නොවුයේද, කුසල ධර්ම වඩන්නේ තමන්ගේ ප්‍රතිපත්ති පිරීම ගැන උපාධ්‍යයන් වහන්සේ ලා සහ ස්බ්‍රහ්මචාරීන්වහන්සේලා දැනුවත් කරයි.
(iv) අකුසල යන් දුරුකිරීමට හා කුසල ධර්මයන් වඩා ගැනීමට වීර්යය වඩාද, නොසිදී එම වීර්යය පවත්වන්නේද ,
(v) ප්‍රඥාවෙන් විදසුන්යු නුවනක්ක්ත දියුණු කරන්නේ වේද, වේද ඇතිවීම හා නැති වීම දැක්ක හැකි සමාධියක් ප්‍රඥාවක් ඇත්තේ වේද,

§ 3 ඒ භික්ෂුව මෙසේ සිතයි.
(i) මම ශ්‍රද්ධාවෙන් සමන්විත වුයේ තථාගතයන් වහන්සේ ගේ බුද්ධත්වය ගැන අරහත්වය , දෙවියන්ට මිනිසුන්ට සාස්තෘ බව සම්පුර්ණ විශ්වාසයෙන් ඉන්නා වඩනා මම සියලු කෙලෙස් නසා විමුක්තිය නොලබන්නට වෙර නොදරන්නේ මන්ද?.
(ii) මනා සෞක්ඛ්‍යයෙන් යුක්තවුයේ මම ඉතා කලාතුරකින් රෝගයන්ගෙන් ආබාධයන්ගෙන් යුක්තවුයේ භාවනා කිරීමට සුදුසු වඩා උණුසුම් නොවුද, ඉතා සීතල නොවුද ශරීර යක් ඇති වඩනා මම සියලු කෙලෙස් නසා විමුක්තිය නොලබන්නට වෙර නොදරන්නේ මන්ද? ,
(iii) “අවංකවුවේ සටකපට නොවුයේ, කුසල ධර්ම වඩන්නේ තමන්ගේ ප්‍රතිපත්ති පිරීම ගැන උපාධ්‍යයන් වහන්සේ ලා සහ ස්බ්‍රහ්මචාරීන්වහන්සේලා දැනුවත් කරයමින් ඉන්නා මම සියලු කෙලෙස් නසා විමුක්තිය නොලබන්නට වෙර නොදරන්නේ මන්ද?
(iv) අකුසල යන් දුරුකිරීමට හා කුසල ධර්මයන් වඩා ගැනීමට වීර්යය වඩාද, නොසිදී එම වීර්යය වඩනා මම සියලු කෙලෙස් නසා විමුක්තිය නොලබන්නට වෙර නොදරන්නේ මන්ද?
(v) ප්‍රඥාවෙන් විදසුන් නුවනක් දියුණු කරන්නේ වේද, වේද ඇතිවීම හා නැති වීම දැක්ක හැකි සමාධියක් ප්‍රඥාවක් වඩනා මම සියලු කෙලෙස් නසා විමුක්තිය නොලබන්නට වෙර නොදරන්නේ මන්ද? මෙසේ ගුණ පසකින් යුතු භික්ෂුව සියලු කෙලෙස් නසා ලබනා විමුක්තිය ප්‍රාර්ථනා කරයි.

AN 05-14-06 .
ඔපරජ්ජ පත්‍ථනා සූත්‍රය

§ 1. “මහණෙනි,
කරුණු පසකින් යුක්තවූ මසතකයෙහි අභිෂේක කරණ ලද ක්‍ෂත්‍රිය රජහුගේ වැඩිමහළු පුත්‍රයා යුව රජ බව පතයි.
“කවර පසකින්ද යත්?
මහණෙනි, මේ ලෝකයෙහි මස්තකයෙහි අභිෂේක කරණ ලද්දාවූ ක්‍ෂත්‍රිය රජහුගේ වැඩිමහළු පුත්‍රයා

  • “ මව් පසින්ද, පිය පසින්ද, යන දෙපසින් සත්වෙනි පියමුතු පරම්පරාව දක්වා පිරිසිදු වූ ක්ෂත්‍රිය ගෝත්‍රයෙන් පැවත එන්නේය. මනාව උපන්නේ වෙති , පිරිසිදු පිළිසිඳගැනීම් ඇත්තේය , අන් කුල ගෝත්‍ර විසින් බැහැර කරණ ලද්දේ නොවෙ, ජාතිවාදයෙන් නින්දා නොකරණ ලද්දේය .
  • “ විශිෂ්ට රූ ඇත්තේය, දැකුම් කටයුතු වූයේ, දුටුවන් ප්‍රසාද එලවන්නේ ඔහු විශිෂ්ට රූ ඇත්තෙකි. දුටුවන් ප්‍රසාද එලවන්නේය. ,
  • මා පියන්ටද ඔහු ඉතා ප්‍රිය වෙත්
  • “ බලවත්වූ චතුරංග සේනාවන් ට ඔහු ප්‍රිය වෙත්.
  • “ඥාන වන්ත වේ. අතීතයෙහි වූ දෙයින්ද දැන් වන්නාවූ දෙයින්ද අනාගතයෙහි විය හැකි දේ ගැන නිර්ණය කොට කටයුතු කිරීමට නුවණ ඇත්තෙකි

§ 2  එසේ වූ ක්ෂත්‍රිය පුත්‍රයා මෙසේ සිතයි.

  • “ මව් පසින්ද, පිය පසින්ද, යන දෙපසින් සත්වෙනි පියමුතු පරම්පරාව දක්වා පිරිසිදු වූ ක්ෂත්‍රිය ගෝත්‍රයෙන් පැවත එන්නේ වෙමි , මනාව උපන්නේ වෙමි , පිරිසිදු පිළිසිඳගැනීම් ඇත්තේ වෙමි , අන් කුල ගෝත්‍ර විසින් බැහැර කරණ ලද්දේ නොවෙමි, ජාතිවාදයෙන් නින්දා නොකරණ ලද්දේ වෙමි. ඉදින් මම මේ රාජ්‍යයේ යුව රජ බව කෙසේ නොපතා ඉම්ද? ,
  • “මම විශිෂ්ට රූ ඇත්තේ වෙමි, දැකුම් කටයුතු වූයේ, දුටුවන් ප්‍රසාද එලවන්නේ මම විශිෂ්ට රූ ඇත්තේ වෙමි, දැකුම් කටයුතු වූයේ, දුටුවන් ප්‍රසාද එලවන්නේ වෙමි , ඉදින් මම මේ රාජ්‍යයේ යුව රජ බව කෙසේ නොපතා ඉම්ද? ,
  • මගේ මා පියන්ටද මා ප්‍රිය වෙත් ඉදින් මම මේ රාජ්‍යයේ යුව රජ බව කෙසේ නොපතා ඉම්ද?
  • “ බලවත්වූ චතුරංග සේනාවන් ට මා ප්‍රිය වෙත්.ඉදින් මම මේ රාජ්‍යයේ යුව රජ බව කෙසේ නොපතා ඉම්ද? ,
  • “ඥාන වන්තවුද, අතීතයෙහි වූ දෙයින්ද දැන් වන්නාවූ දෙයින්ද අනාගතයෙහි විය හැකි දේ ගැන නිර්ණය කොට කටයුතු කිරීමට මා නුවණ ඇත්තා වෙමි , පණ්ඩිත වෙමි ,ඉදින් මම මේ රාජ්‍යයේ යුව රජ බව කෙසේ නොපතා ඉම්ද?

මෙසේ කරුණු පසකින් යුක්තවූ මසතකයෙහි අභිෂේක කරණ ලද ක්‍ෂත්‍රිය රජහුගේ වැඩිමහළු පුත්‍රයා යුව රජ බව පතයි

§ 3   .“එසේම මහණෙනි,
ගුණාංග පසකින් යුක්තවූ භික්ෂුව සියලු ක්ලේශයන් ස්මුලච්චේද කොට ලබන නිර්වාණය පතයි.
“කවර ගුණ පසකින්ද යත්?
මහණෙනි, මේ

  • භික්‍ෂුව ,“සිල්වත්වූයේද, ප්‍රාතිමෝක්‍ෂ සංවර ශීලයෙන් යුක්තවූයේ වේද, ආචාරයෙන් හා ගෝචරයෙන් යුක්තව වාසය කෙරේද, ස්වල්ප තරම් වරදවල භය දක්නාසුළු වූයේ, ශික්‍ෂා පදයන්හි සමාදන්ව හික්මේද,“මස්තකයෙහි අභිෂේක කරණ ලද්දාවූ ජාති සම්පන්නවූ ක්‍ෂත්‍රිය රජ මෙනි.
  • “බහුශ්‍රුතවූයේ, ඇසූ දෙය දරන්නේ, අසන ලද්දවුන්ගේ රැස් කිරීම් ඇත්තේ වේද, යම් ඒ ධර්මයෝ මුල යහපත්වූවාහු, මැද යහපත්වූවාහු, කෙළවර යහපත්වූවාහු, අර්ත්‍ථ සහිත වූවාහු, ව්‍යඤ්ජන සහිත වූවාහු, සියල්ලෙන් සම්පූර්‍ණවූ පිරිසිදුවූ බ්‍රහ්මචර්‍ය්‍යාව ප්‍රකාශ කෙරෙද්ද, එබඳුවූ ධර්මයෝ මොහු විසින් බොහෝකොට අසන ලද්දාහු, දරණ ලද්දාහු, වචනයෙන් පුරුදු කරණ ලද්දාහු, සිතින් සලකන ලද්දාහු, දෘෂ්ටියෙන් මනාව ප්‍රතිවේධ කරණ ලද්දාහු වෙද්ද,
  • “සතර සතිපට්ඨානයෙහි මනාව සිත පිහිටුවා හැම විටම පිහිට සිටි සතියෙන් වාසය කරන්නේද ඒ ආඪ්‍යවූ, මහත් ධන ඇත්තාවූ, මහත් සම්පත් ඇත්තාවූ, පිරිපුන් ගබඩා කොටුගුල් ඇත්තාවූ, මස්තකයෙහි අභිෂේක කරණ ලද්දාවූ ක්‍ෂත්‍රිය රජ මෙනි.
  • නීති සතර සම්‍යක් ප්‍රධාන වීර්ය වඩන්නේ ( ඉපදෙන අකුසල් දුරු කරලීමට, නුපදුන අකුසල් නොඉපිදවීමට , ඉපදුනු කුසල් දියුණු කරලීමට, නුපන් කුසල් ඉපදවීමට කරන වීර්‍යය.)
  • සම්පුර්ණ ක්ලේශ ප්‍රහාණය කිරීමේ ආර්ය මාර්ගය දන්නේ ඒ මාර්ගයේම ප්‍රතිපත්ති පුරන්නේ වේද

“ඔහුට මෙබඳු සිතක් වෙයි.

  • මම සිල්වත්වූයේ වෙමි , ප්‍රාතිමෝක්‍ෂ සංවර ශීලයෙන් යුක්තවූයේ වෙමි, …‘ කුමක් හෙයින් මම ආශ්‍රවයන් නැසීම නොපතන්නෙම්ද?
  • “මම බහුශ්‍රුතවූයේ වෙමි , ඇසූ දෙය දරන්නේ, අසන ලද්දවුන්ගේ රැස් කිරීම් ඇත්තේ වේ….,‘ කුමක් හෙයින් මම ආශ්‍රවයන් නැසීම නොපතන්නෙම්ද?
  • “සතර සතිපට්ඨානයෙහි මනාව සිත පිහිටුවා හැම විටම …..‘ කුමක් හෙයින් මම ආශ්‍රවයන් නැසීම නොපතන්නෙම්ද?
  • නීති සතර සම්‍යක් ප්‍රධාන වීර්ය වඩන්නෙමි ……………………………….‘ කුමක් හෙයින් මම ආශ්‍රවයන් නැසීම නොපතන්නෙම්ද?
  • සම්පුර්ණ ක්ලේශ ප්‍රහාණය කිරීමේ මග කුමක්දැයි දන්නා මම කුමක් හෙයින් මම ආශ්‍රවයන් නැසීම නොපතන්නෙම්ද?

AN 05-14-07.
අප්පසුපන සූත්‍රය

“මහණෙනි,
මොව්හු පස් දෙනා රාත්‍රියෙහි මනාව නිදන්නට අසමත් වෙති..
“කවර පස් දෙනෙක්ද යත්?
මහණෙනි,
(1) පිරිමියෙක් ගැන අදහස් ඇති ස්ත්‍රිය .
(2) ස්ත්‍රීයක් ගැන පිලිබඳ අදහස් ඇති පුරුෂයා,
(3) සොරකමක් කිරීමට අදහස් ඇති චෞරයා
(4) රාජකාරිය ගැන වෙහෙසෙන රජ
(5) විසංයෝගයෙහි හෙවත් නිවණෙහි අදහස් ඇත්තාවූ භික්ෂු ව
“මහණෙනි, මොහු පස් දෙනා රාත්‍රියෙහි අල්පව නිදත්. බොහෝකොට නොනිදත්.

AN 05-14-08.
භත්තාදක නාද සූත්‍රය

§ 1. “මහණෙනි,
කරුණු පසකින් යුක්තවූ රජහුගේ හස්තියා රාජකීය හස්තියෙක් නොව කෑම ගිලින්නෙක්, ගොම හෙලන්නෙක් හා නිකමෙක් යැයි ද රාජකීය හස්තියෙකු ලෙස ගන්නට නොසුදුසු යැයි ද කියයි.

“කවර පසකින්ද යත්?
මහණෙනි, මේ හස්තියා

“රූපයන් නොඉවසන්නේ වේද,
ශබ්දයන් නොඉවසන්නේ වේද,
ගන්‍ධයන් නොඉවසන්නේ වේද,
රසයන් නොඉවසන්නේ වේද,
ස්පර්‍ශ ය නොඉවසන්නේ වේද යන පසිනි.

“මහණෙනි, මේ ලක්ෂණ පසින් යුත් ඇතා රාජකීය හස්තියෙකු නොව කෑම ගිලින්නෙක්, ගොම හෙළන්නෙක්, නිකමෙක් යැයි මිනිසුන් කියයි.

§ 2 .“මහණෙනි, මෙපරිද්දෙන්ම කරුණු පසකින් යුක්තවූ භික්‍ෂුව, බත් ගිලින්නෙක්, වැසිකිලි පුරවන්නෙක්, පුටු රත්කරන්නෙක්, මිස භික්ෂුවක් ලෙස ජනයා නොසලකයි.

“කවර පසකින්ද යත්?
මේ ශාසනයෙහි භික්‍ෂුව රූපය නොඉවසන්නේ වේද,
ශබ්දයන් නොඉවසන්නේ වේද,
ගන්‍ධයන් නොඉවසන්නේ වේද,
රසයන් නොඉවසන්නේ වේද,
ස්පර්‍ශය නොඉවසන්නේ වේද
යන පසිනි.

“මහණෙනි, මෙපරිද්දෙන්ම කරුණු පසකින් යුක්තවූ භික්‍ෂුව බත් ගිලින්නෙක්ද, අවකාශය පුර වන්නෙක්ද, පුටුව මඩින්නෙක්ද, සළාක කන්නෙක්ද වේ. භික්‍ෂුන්ය කියනා සංඛ්‍යාවට නොපැමිණේ.

AN 05-14-09.
අක්ඛම නාග සූත්‍රය

§ 1 .“මහණෙනි, කරුණු පසකින් යුක්තවූ හස්තියෙක් රජුගේ සේවය පිණිස රාජ්‍ය හස්තියා ලෙස සේවයට සුදුසු නොවෙයි. රජුන් විසින් පරිභෝග කටයුතු නොවෙයි. රජහුගේ අවයවයක්ය කියන සංඛ්‍යාවට නොපැමිණේ.

“කවර පසකින්ද යත්?
මහණෙනි, රජහුගේ හස්තියා

“(1) රූපයන් නොඉවසන්නේ වේද,
(2) ශබ්දයන් නොඉවසන්නේ වේද,
(3) ගන්‍ධයන් නොඉවසන්නේ වේද,
(4) රසයන් නොඉවසන්නේ වේද,
(5) ස්පර්‍ශ ය නොඉවසන්නේ වේද යන පසිනි.

(1) “කෙසේනම් රජහුගේ හස්තියා රූපයන් නොඉවසන්නේ වේද?

“මහණෙනි, මෙහි රජහුගේ හස්තියා යුද්‍ධයට පැමිණියේ, හස්ති සේනාව හෝ දැක , අශ්ව සේනාව හෝ දැක, රථ සේනාව හෝ දැක, පාබල සේනාව හෝ දැක, බියට පත්යෙවේද, යුද බිමට නොබසීද, පසු බසියිද, විශේෂයෙන් සැලෙයිද, ස්ථිරව නොසිටියිද. “මහණෙනි, මෙසේවූ හස්තියකු රූපයන් නොඉවසන්නේ වේ.
මහණෙනි,

(2) කෙසේනම් රජහුගේ හස්තියා තෙම ශබ්දයන් නොඉසන්නේ වේද,
“මහණෙනි,
රජහුගේ හස්තියා යුද්‍ධයට පැමිණියේ සතුරු හමුදාවේ ඇතුන්ගේ ශබ්දයක් අසා අසුන්ගේ ශබ්දයක් හෝ අසා, රථයන්ගේ ශබ්දයක් හෝ අසා, පාබල සේනාවගේ ශබ්දයක් හෝ අසා, බෙර, පනාබෙර, සක්, සින්නය නාදයක් හෝ අසා, බියවේද, “පසුබසියිද, විශේෂයෙන් ගැලෙයිද, ස්ථිරව නොසිටියිද. යුද්‍ධයට බැසගන්ට නොහැකිවේද, මහණෙනි, මෙසේ වූ රජහුගේ හස්ති තෙම ශබ්දයන් නොඉවසන්නේ වේ.

(3), කෙසේ නම් රජහුගේ හස්තියකු ගන්‍ධයන් නොඉවසන්නේ වේද,
“මහණෙනි, රජහුගේ හස්තියා යුද්‍ධයට පැමිණිය විට , මනාව උපන්නාවූ යුද්‍ධ භූමියෙහි හැසිරෙන්නාවූ රජහුගේ හමුදාවේ අනෙක් හස්තීහු වෙද්ද, ඔවුන්ගේ මල, මූත්‍ර ගඳ ආඝ්‍රාණය කොට රජුගේ හස්තියා පසුබසියිද, විශේෂයෙන් ගැලෙයිද, ස්ථිරව නොසිටියිද. යුද්‍ධයට බැසගන්ට නොහැකිවේද, මහණෙනි, මෙසේ රජහුගේ හස්තියා ගන්‍ධයන් නොඉවසන්නේ වේ.

(4) , කෙසේ නම් රජහුගේ හස්තියා රසයන් නොඉවසන්නේ වේද,
“මහණෙනි,
රජහුගේ හස්තියා යුද්‍ධයට පැමිණ එක් දිනකවූ විට ආහාරය පිණිස, තණ හා බීමට දිය නොලද්දේ නම්, දින දෙකකින්කි නොලද්දේ නම්, දින තුනකින් නොලද්දේ නම් උහු පසුබසියිද, විශේෂයෙන් බිමට ගැලෙයිද, ස්ථිරව නොසිටියිද. යුද්‍ධයට බැසගන්ට නොහැකිවේද, “මහණෙනි, රජහුගේ හස්තියා රසයන් නොඉවසන්නේ වෙයි.

(5) කෙසේ නම් රජහුගේ හස්තියා ස්පර්‍ශය නොඉවසන්නේ වේද?
“මහණෙනි,
මෙහි රජහුගේ හස්තියා යුද්‍ධයට පැමිණියේ එක් ඊසැර විදීමකින් විදින ලද්දේ හෝ දෙකකින් හෝ තුනකින් හෝ සතරකින් හෝ පසකින් හෝ ඊසැර විදුම් වලින් විදින ලද්දේ මේ ඊ තල වලින්ප වූ වේදනාව නිසා පසුබසියිද, විශේෂයෙන් ගැලෙයිද, ස්ථිරව නොසිටියිද. යුද්‍ධයට බැසගන්ට නොහැකිවේද, මහණෙනි, මෙසේ රජහුගේ හස්තියා ස්පර්‍යශ නොඉවසන්නේ වෙයි.

“මහණෙනි, මේ ගති පසකින් යුක්තවූ හස්තියා රජුන්ට සුදුසු නොවෙයි. රජුන් විසින් පරිභෝග කටයුතු නොවෙයි. රජහුගේ අවයවයක්ය කියාම සංඛ්‍යාවට නොපැමිණේ.

§ 2 . “මහණෙනි,
මෙපරිද්දෙන්ම අඞඟ පසකින් යුක්තවූ භික්‍ෂු තෙම පූජාවට සුදුසු නොවෙයි.
දුර සිට ගෙනෙන ලද සත්කාරයට සුදුසු නොවෙයි.
දක්‍ෂිණාවට සුදුසු නොවෙයි. ඇඳිලි කිරීමට සුදුසු නොවෙයි.
ලෝකයාගේ උතුම් පින් කෙත නොවෙයි.

“කවර පසකින්ද යත්?
මහණෙනි,
භික්‍ෂුව රූප නොඉවසන්නේ වේද,
ශබ්ද නොඉවසන්නේ වේද,
ගන්‍ධ නොඉවසන්නේ වේද,
රස නොඉවසන්නේ වේද,
ස්පර්‍ශ නොඉවසන්නේ වේද
යන පසිනි.

§ 2.1 “මහණෙනි,
කෙසේ නම් භික්‍ෂුව රූප නොඉවසන්නේ වේද?
මහණෙනි, භික්‍ෂුව රූපය ඇසින් දැක තම සිතට ප්‍රිය රූපයෙහි ඇළේද, ඒ ආශ්වාදයෙන් මුසපත්වූ ඔහුගේ සිත වික්ෂිප්ත වේද, සිය භාවනා අරමුණෙහි සිත පිහිටුවන්ට සිත සමාධි කර ගන්නට නොහැකි වේද, මහණෙනි, භික්‍ෂුවක් මෙසේ රූපයන් නොඉවසන්නේ එසේ ය.

§ 2.2. මහණෙනි,
කෙසේ නම් භික්‍ෂුව ශබ්දයන් නොඉවසන්නේ වේද,
මහණෙනි, භික්‍ෂුව කණින් ශබ්දයක් අසා, කන් කළු ශබ්දයෙහි ඇලේද, ඒ ආශ්වාදයෙන් මුසපත්වූ ඔහුගේ සිත වික්ෂිප්ත වේද, සිය භාවනා අරමුණෙහි සිත පිහිටුවන්ට සිත සමාධි කර ගන්නට නොහැකි වේද, මහණෙනි, භික්‍ෂුවක් මෙසේ රූපයන් නොඉවසන්නේ එසේ ය.

§ 2.3. කෙසේ නම් භික්‍ෂු තෙම ගන්‍ධයන් නොඉවසන්නේ වේද,
මහණෙනි, මෙහි භික්‍ෂුවක් නාසයෙන් ගන්‍ධය ආඝ්‍රාණය කොට ඇලුම් කටයුතු ගන්‍ධයෙහි ඇලේද, ඒ ආශ්වාදයෙන් මුසපත්වූ ඔහුගේ සිත වික්ෂිප්ත වේද, සිය භාවනා අරමුණෙහි සිත පිහිටුවන්ට සිත සමාධි කර ගන්නට නොහැකි වේද, මහණෙනි, භික්‍ෂුවක් මෙසේ ගන්ධයන් නොඉවසන්නේ එසේ ය.

§ 2.4. මහණෙනි, කෙසේනම් භික්‍ෂුවක් රසයන් නොඉවසන්නේ වේද,
මහණෙනි, භික්‍ෂුවක් දිවෙන් රසය විඳ ඇලුම් කටයුතු රසයෙහි ඇලේද, ඒ ආශ්වාදයෙන් මුසපත්වූ ඔහුගේ සිත වික්ෂිප්ත වේද, සිය භාවනා අරමුණෙහි සිත පිහිටුවන්ට සිත සමාධි කර ගන්නට නොහැකි වේද, මහණෙනි, භික්‍ෂුවක් මෙසේ රසයන් නොඉවසන්නේ එසේ ය.

§ 2.5. මහණෙනි, කෙසේ නම් භික්‍ෂුවක් ස්පර්‍ශ ය නොඉවසන්නේ වේද?
මහණෙනි, භික්‍ෂුවක් කයින් ස්පර්‍ශ යක් ලබා ඒ ගැන සිතා ඒ ඇලුම් කොට ඒ ස්පර්‍ශ යෙහි ඇලේද, ඒ ආශ්වාදයෙන් මුසපත්වූ ඔහුගේ සිත වික්ෂිප්ත වේද, සිය භාවනා අරමුණෙහි සිත පිහිටුවන්ට සිත සමාධි කර ගන්නට නොහැකි වේද, මහණෙනි, භික්‍ෂුවක් මෙසේ ස්පර්ශය නොඉවසන්නේ එසේ ය.

“මහණෙනි, මෙපරිද්දෙන් අඞඟ පසකින් යුක්තවූ භික්‍ෂුවක් පූජාවට සුදුසු නොවෙයි. දුර සිට ගෙනෙන ලද සත්කාරයට සුදුසු නොවෙයි. දක්‍ෂිණාවට සුදුසු නොවෙයි. ඇඳිලි කිරීමට සුදුසු නොවෙයි. ලෝකයාගේ උතුම් පින් කෙත නොවෙයි.

§ 3.0 “මහණෙනි, කරුණු පසකින් යුක්තවූ රජහුගේ හස්ති යෙකු රජුන්ට සුදුසු වේ. රජුන් විසින් පරිභොග කටයුතු වේ. රජහුගේ අවයවයක කියාම සංඛ්‍යාවට පැමිණේ.

“කවර පසකින්ද යත්?
මහණෙනි,
රජහුගේ හස්තියා රූපයන් ඉවසන්නේ වේ,
ශබ්දයන් ඉවසන්නේ වේ,
ගන්‍ධයන් ඉවසන්නේ වේ,
රසයන් ඉවසන්නේ වේ,
ස්පර්‍ශ කළ යුත්තන් ඉවසන්නේ වේ යන පසිනි.

§ 3.1. “මහණෙනි, කෙසේ නම් රජහුගේ හස්තියා රූපයන් ඉවසන්නේ වේද,
මහණෙනි, රජහුගේ හස්තියා යුද්‍ධයට පැමිණියේ, හස්ති සේනාව හෝ දැක , අශ්ව සේනාව හෝ දැක, රථ සේනාව හෝ දැක, පාබල සේනාව හෝ දැක, නොපසුබසීද, විශේෂයෙන් නොගැලෙයිද, ස්ථිරව සිටියිද, යුද්‍ධයට බැසගන්ට හැකිවේද, මහණෙනි, මෙසේ වනාහි රජහුගේ හස්ති තෙම රූපයන් ඉවසන්නේ වේ.

§ 3.2 . මහණෙනි, කෙසේ නම් රජහුගේ හස්තියා ශබ්දයන් ඉවසන්නේ වේද?
මහණෙනි, රජහුගේ හස්තියා යුද්‍ධයට පැමිණියේ ඇතුන්ගේ ශබ්දයක් හෝ අසා අසුන්ගේ ශබ්දයක් හෝ අසා, රථයන්ගේ ශබ්දයක් හෝ අසා, පාබල සේනාවගේ ශබ්දයක් හෝ අසා, බෙර, පනාබෙර, සක්, සින්නය නාදයක් හෝ අසා, නොපසුබසීද, විශේෂයෙන් නොගැලෙයිද, ස්ථිරව සිටියිද, යුද්‍ධයට බැසගන්ට හැකිවේද, මහණෙනි, මෙසේ වනාහි රජහුගේ හස්ති තෙම ශබ්දයන් ඉවසන්නේ වෙයි.

§ 3.3 . මහණෙනි, කෙසේ නම් රජහුගේ හස්තියා ගන්‍ධයන් ඉවසන්නේ වේද,
මහණෙනි, රජහුගේ හස්තියා යුද්‍ධයට පැමිණියේ, මනාව උපන්නාවූ යුද්‍ධ භූමියෙහි හැසිරෙන්නාවූ යම් ඒ රජහුගේ හස්තීහු වෙද්ද, ඔවුන්ගේ මල, මූත්‍ර ගඳ ආඝ්‍රාණය කොට නොපසුබසීද, විශේෂයෙන් නොගැලෙයිද, ස්ථිරව සිටියිද, යුද්‍ධයට බැසගන්ට හැකිවේද, මහණෙනි, මෙසේ වනාහි රජහුගේ හස්ති තෙම ගන්‍ධයන් ඉවසන්නේ වේ.

§ 3.4 .මහණෙනි, කෙසේ නම් රජහුගේ හස්තියා රසයන් ඉවසන්නේ වේද,
මහණෙනි, රජහුගේ හස්තියා යුද්‍ධයට පැමිණියේ එක් දිනකවූ තණ දිය දීමකින් හෝ, බුහුමන් නොලද්දේ දෙකකින් හෝ තුනකින් හෝ සතරකින් හෝ පහකින් හෝ තණ දිය දීම් වලින් බුහුමන් නොලද්දේ නොපසුබසීද, විශේෂයෙන් නොගැලෙයිද, ස්ථිරව සිටියිද, යුද්‍ධයට බැසගන්ට හැකිවේද, මහණෙනි, මෙසේ වනාහි රජහුගේ හස්ති තෙම රසයන් ඉවසන්නේ වෙයි.

§ 3.5 . මහණෙනි, කෙසේ නම් රජහුගේ හස්තියා ස්පර්‍ශය ඉවසන්නේ වේද,
මහණෙනි, මෙහි රජහුගේ හස්තියා යුද්‍ධයට පැමිණියේ එක් ඊසැර විදීමකින් විදින ලද්දේ හෝ දෙකකින් හෝ තුනකින් හෝ සතරකින් හෝ පසකින් හෝ ඊසැර විදුම් වලින් විදින ලද්දේ නොපසුබසීද, විශේෂයෙන් නොගැලෙයිද, ස්ථිරව සිටියිද, යුද්‍ධයට බැසගන්ට හැකිවේද, මහණෙනි, මෙසේ වනාහි රජහුගේ හස්ති තෙම ස්පර්‍ශ කළ යුත්තන් ඉවසන්නේ වේ

.“මහණෙනි, මෙසේ කරුණු පසකින් යුක්තවූරජහුගේ හස්තියා රජුන්ට සුදුසු වේ. රජුන් විසින් පරිභොග කටයුතු වේ. රජහුගේ අවයවයක කියාම සංඛ්‍යාවට පැමිණේ.

§ 4 . “මහණෙනි, මෙපරිද්දෙන්ම අඞඟ පසකින් යුක්තවූ භික්‍ෂුව පූජාවට සුදුසු වෙයි.
දුර සිට ගෙනෙන ලද සත්කාරය ලැබීමට සුදුසු වෙයි.
දක්‍ෂිණාවට සුදුසු වෙයි.
ඇඳිලි කිරීමට සුදුසු වෙයි.
ලෝකයාගේ උතුම් පින් කෙත වෙයි.
“කවර පසකින්ද යත්?

මෙහි භික්‍ෂු ව රූපයන් ඉවසන්නේ වේද,
ශබ්දයන් ඉවසන්නේ වේද,
ගන්‍ධයන් ඉවසන්නේ වේද,
රසයන් ඉවසන්නේ වේද,
ස්පර්‍ශ කළ යුත්තන් ඉවසන්නේ වේද
යන පසිනි.

§ 4.1 “මහණෙනි, කෙසේ නම් භික්‍ෂුව රූප ඉවසන්නේ වේද?
මහණෙනි, භික්‍ෂුව ඇසින් රූපය දැක ඒ ගැන සිතිවිල්ල ට ඇළුම් කටයුතුවූ රූපයකැයි නොසිතා යෝනිසෝ මනසිකාරය පවත්වමින් ඒ දර්ශනය පමණක් බව ඇලීමකින් හෝ ගැටීමකින් තොරව දැන ගන්නා වූ භික්ෂුව රූප ඉවසන්නේ වේ.

§ 4.2 . මහණෙනි, කෙසේ නම් භික්‍ෂුව ශබ්ද ඉවසන්නේ වේද?
මහණෙනි, භික්‍ෂුව කණින් ඇසු ශබ්දය යෝනිසෝ මනසිකාරයෙන් ම අසා කන්කළු වූ එම ශබ්දයෙහි නොඇලේද, අප්‍රිය වූ ශබ්දයෙහි නොගැටේ ද ශබ්දයක් ම පමණක් බව දනීද මහණෙනි, මෙසේ භික්‍ෂුව ශබ්ද ඉවසන්නේ වේ.

§ 4.3 . මහණෙනි, කෙසේ නම් භික්‍ෂුව ගන්ධ ඉවසන්නේ වේද?
මහණෙනි, භික්‍ෂු ව නාසයෙන් ලද ගඳ යෝනිසෝ මනසිකාරයෙන් විඳ එහි ඇලීමට හෝ ගැටීමට කිසිවක් නොදකින්නේ ගන්ධයක් පමණක් බව දකින්නේ නම් ,මෙසේ භික්‍ෂුව ගන්ධය ඉවසන්නේ වේ.

§ 4.4 . මහණෙනි, කෙසේ නම් භික්‍ෂු ව රස ඉවසන්නේ වේද?
මහණෙනි, භික්‍ෂු ව දිවෙන් ලද රසය යෝනිසෝ මනසිකාරයෙන් විඳ ඇළුම් කටයුතු රසයෙහි නොඇලේද, නුරුස්නා රසය කෙරෙහි පටිඝය නුපදවාද, රසය රසයක් පමණක් බවත් දැන ගන්නේය. මහණෙනි, මෙසේ භික්‍ෂුව රස ඉවසන්නේ වේ.

§ 4.5 . මහණෙනි, කෙසේ නම් භික්‍ෂුව ස්පර්‍ශය ඉවසන්නේ වේද?
මහණෙනි, භික්‍ෂුව කයින් ලද ස්පර්‍ශය ගැන යෝනිසෝ මනසිකාරයෙන් මෙනෙහි කොට ඒ ස්පර්ශ සඥාවෙහි නොඇලේද, නොගැටේ ද මහණෙනි, මෙසේ භික්‍ෂුව ස්පර්‍ශය ඉවසන්නේ වේ.

“මහණෙනි, මෙසේ ගුණ පසකින් යුක්තවූ භික්‍ෂු ව පූජාවට සුදුසු වෙයි.
දුර සිට ගෙනෙන ලද සත්කාරයට සුදුසු වෙයි.
දක්‍ෂිණාවට සුදුසු වෙයි.
ඇඳිලි බැඳ වන්දනා කිරීමට සුදුසු වෙයි.
ලෝකයාගේ උතුම් පින් කෙත වෙයි

AN 05-14-10.
සොතාරනාග සූත්‍රය

§ 1. “මහණෙනි, අඞ්ග පසකින් යුක්තවූ හස්තියා රජුන්ට සුදුසු වේ. රජුන් විසින් පරිභෝග කටයුතු වේ. රජහුගේ අංගයකැයි යන සංඛ්‍යාවට පැමිණේ.
කවර පසකින්ද යත්.

මහණෙනි, රජහුගේ හස්තියා
“අසන්නේ වේද,
නසන්නේ වේද,
රකින්නේ වේද,
ඉවසන්නේ වේද,
යන්නේ වේද, යන පසිනි.

§ 1.1. “මහණෙනි, කෙසේ නම් රජහුගේ හස්තියා අසන්නේ වේද?
මෙහි රජුගේ හස්තියා ඇතු ගොවුවා ඔහුට දෙන විධානයට මනාව කන් දේ. කලින් අසා ඇති හෝ නැති මුත් ඒ විධානයට කන්දී එය අවබෝධකරගන්නට මුළු මනින්ම අවධානය යොදයි. හස්තියා අසන්නෙක් වන්නේ එසේය.

§ 1.2. මහණෙනි, කෙසේ නම් රජහුගේ හස්තියා නසන්නෙක් වේද?
මහණෙනි, රජහුගේ හස්තියා යුද බිමට වන විට සතුරු සේනාවේ ඇතුන් නසන්නේය. උන්ගේ ඇත සරුවෝද නසයි. සතුරන්ගේ අසුන්ද නසයි. අසරුවන්ද නසයි. සතුරු යානාද නසයි. රියෙහි වූවහුද නසයි. පාබල සෙනගද නසයි. මහණෙනි, මෙසේ රජහුගේ හස්තියා නසන්නෙක් වේ.

§ 1.3 මහණෙනි, කෙසේ නම් රජහුගේ හස්තියා රකින්නෙක් වේද?
මහණෙනි, රජහුගේ හස්තියා යුද්‍ධයට පැමිණි විට ඉදිරි කය රකියිද, පැසුළු කය රකියිද, ඉදිරි පා රකියිද, පැසුළු පා රකියිද, හිස රකියිද, කන් රකියිද, දළ රකියිද, සොඬ රකියිද, වලිගය රකියිද, ඇත්රුවා රකියිද, මහණෙනි, මෙසේ රජහුගේ හස්තියා රකින්නෙක් වේ.

§1.4. මහණෙනි, කෙසේ නම් රජහුගේ හස්තියා ඉවසන්නෙක් වේද?
මහණෙනි, රජහුගේ ඇත්හු උන් ලබන අඩයටි පහරවල්ද, කඩු පහරවල්ද, ඊ පහරවල්ද, පොරෝ පහරවල්ද, බෙර, පනා බෙර, සක්, සින්නම් නාදයන් ඉවසන්නේ වේද, මහණෙනි, මෙසේ රජහුගේ හස්තියා ඉවසන්නෙක් වේ.

§ 1.5. මහණෙනි, කෙසේ නම් රජහුගේ හස්තියා යන්නේ වේද,
මහණෙනි, රජහුගේ හස්තියා (සිය හික්මවන්නා) සාරථියා යම් දිශාවකට උහු යවාද, ඉදින් පෙර ගිය දිශාවකට හෝ වේවා , ඉදින් පෙර නොගිය දිශාවකට හෝ වේවා , ඒ දිශාවට වහාම යන්නේ වේද, මහණෙනි, මෙසේ රජහුගේ හස්තියා යන්නේ වේ.

“මහණෙනි,මේ අඞ්ග පස සහිත වූ හස්තියා රජුන්ට සුදුසු වේ. රජුන් විසින් පරිභෝග කටයුතු වේ. රජහුගේ අංගයකැයිම සංඛ්‍යාවට පැමිණේ.

§ 2. “මහණෙනි, මෙපරිද්දෙන්ම ගුණඅඞඟ පසකින් යුක්තවූ භික්‍ෂු ව පූජාවට සුදුසු වෙයි. දුර සිට ගෙනෙන ලද සත්කාරයට සුදුසු වෙයි. දක්‍ෂිණාවට සුදුසු වෙයි. ඇඳිලි කිරීමට සුදුසු වෙයි. ලෝකයාගේ උතුම් පින් කෙත වෙයි.
“කවර පසකින්ද යත්?
මහණෙනි, මෙහි භික්‍ෂු තෙම අසන්නේද,
* අසන්නේ වේද,
** නසන්නේ වේද,
*** රකින්නේ වේද.
**** ඉවසන්නේ වේද,
***** යන්නේ වේද
යන පසිනි.

§ 2.1. “මහණෙනි, කෙසේ නම් භික්‍ෂුව අසන්නේ වේද?
මහණෙනි, මේ ශාසනයෙහි භික්‍ෂුව තථාගතයන් වහන්සේ විසින් ධර්ම විනය දේශනා කරණ කල්හි ඉතා අවධානයෙන් සැලකිල්ලෙන් සතියෙන් ඇහුම්කන් දෙයි. අවබෝධ කරගනී. අර්ථවත් කොට මෙනෙහි කොට සියල්ල සිතින් රැස්කොට බහා .තබන ලද කන් ඇත්තෝ ධර්මය අසාද, මහණෙනි, මෙසේ භික්‍ෂුව අසන්නේ වේ.

§ 2.2. “මහණෙනි, කෙසේ නම් භික්‍ෂු තෙම නසන්නේ වේද?
මහණෙනි,
# මේ ශාසනයෙහි භික්‍ෂුව උපන්නාවූ කාම විතර්‍කයන්,නොඉවසාද, දුරු කෙර්ද, බැහැර කෙරේද, කෙළවර කෙරේද, නැවත නුපදින සේ අභාවයට පමුණුවාද.“උපන්නාවූ ව්‍යාපාද විතර්‍කය නොඉවසාද, දුරු කෙර්ද, බැහැර කෙරේද, කෙළවර කෙරේද, නැවත අභාවයට පමුණුවාද.
# උපන්නාවූ විහිංසා විතර්‍ක නොඉවසාද, දුරු කෙර්ද, බැහැර කෙරේද, කෙළවර කෙරේද, නැවත අභාවයට පමුණුවාද. උපනූපන් ලාමකවූ අකුශල ධර්මයන් නොඉවසාද, දුරු කෙර්ද, බැහැර කෙරේද, කෙළවර කෙරේද, නැවත අභාවයට පමුණුවාද.
මහණෙනි, මෙසේ මේ ශාසනයෙහි භික්‍ෂු ව නසන්නේ වේ.

§ 2.3. “මහණෙනි, කෙසේ නම් භික්‍ෂු ව රකින්නේ වේද?
.මහණෙනි, මේ ශාසනයෙහි භික්‍ෂුව ඇසින් රූපයක් දැක නිමිති වශයෙන් නොගන්නේ ද, කුඩා ලකුණු වශයෙන් නොගන්නේද, යමක් හේතුකොටගෙන මේ චක්‍ෂුරින්‍ද්‍රියෙහි සංවරයක් නැතිව ඉන්නහුට විෂම ලෝභය, දොම්නස් යනාදී ලාමකවූ අකුශල ධර්මයෝ අනුව වැඩේන්නේ යි දැන . ඔහුගේ ඇස සංවරය පිණිස පිළිපදීද, චක්‍ෂුරිත්‍ද්‍රිය රකීද, චක්‍ෂුරින්‍ද්‍රියයෙහි සංවරයට පැමිණේද,

§2.3.2. “කණින් ශබ්ද අසා නිමිති වශයෙන් නොගන්නේ ද, කුඩා ලකුණු වශයෙන් නොගන්නේ ද, යමක් හේතුකොටගෙන මේ ශෝතේන්‍ද්‍රියයෙහි සංවර නැතිව වාසය කරන්නහුට විෂම ලෝභය, දොම්නස්ය යන ලාමකවූ අකුශල ධර්මයෝ අනුව වැටහෙන්නාහුද. ඔහුගේ කනෙහි සංවරය පිණිස පිළිපදීද, ශ්‍රෝතේන්‍ද්‍රිය රකීද, ශ්‍රෝතේන්‍ද්‍රියයෙහි සංවරයට පැමිණේද,

§ 2.3.3. නාසයෙන් ගන්‍ධ ආඝ්‍රාණය කොට නිමිති වශයෙන් ගන්නේ නොවේද, කුඩා ලකුණු වශයෙන් ගන්නේ නොවේද, යමක් හේතුකොටගෙන මේ ඝානේන්‍ද්‍රියයෙහි සංවර නැතිව වාසය කරන්නහුට විෂම ලෝභය, දොම්නස්ය යන ලාමකවූ අකුශල ධර්මයෝ අනුව වැටහෙන්නාහුද. ඔහුගේ සංවරය පිණිස පිළිපදීද, ඝානේන්‍ද්‍රිය රකීද, ඝානේන්‍ද්‍රියයෙහි සංවරයට පැමිණේද,

§ 2.3.4. දිවෙන් රස විඳ, නිමිති වශයෙන් ගන්නේ නොවේද, කුඩා ලකුණු වශයෙන් ගන්නේ නොවේද, යමක් හේතුකොටගෙන මේ ජිව්හා ඉන්‍ද්‍රියයෙහි සංවර නැතිව වාසය කරන්නහුට විෂම ලෝභය, දොම්නස්ය යන ලාමකවූ අකුශල ධර්මයෝ අනුව වැටහෙන්නාහුද. ඔහුගේ සංවරය පිණිස පිළිපදීද, ජිව්හා ඉන්‍ද්‍රිය රකීද, ජිව්හා ඉන්‍ද්‍රියයෙහි සංවරයට පැමිණේද,

§ 2.3.5. කයින් ස්පර්‍ශ ලද විට ඒ ස්පර්‍ශ ය නිමිති වශයෙන් නොගන්නේද, කුඩා ලකුණු වශයෙන් නොගන්නේ ද, යමක් හේතුකොටගෙන මේ කායේන්‍ද්‍රියෙහි සංවර නැතිව වාසය කරන්නහුට විෂම ලෝභය, දොම්නස්ය යන ලාමකවූ අකුශල ධර්මයෝ අනුව වැටහෙන්නාහුද. ඔහුගේ සංවරය පිණිස පිළිපදීද, කායේන්‍ද්‍රිය රකීද, කායේන්‍ද්‍රියයෙහි සංවරයට පැමිණේද,

§ 2.3.6. සිතින් ධර්‍ම දැන නිමිති වශයෙන් නොගන්නේ ද, කුඩා ලකුණු වශයෙන් නොගන්නේ ද, යමක් හේතුකොටගෙන මේ මනින්‍ද්‍රියසංවර නැතිව වාසය කරන්නහුට විෂම ලෝභය, දොම්නස්ය යන ලාමකවූ අකුශල ධර්මයෝ අනුව වැටහෙන්නාහුද. ඔහුගේ සංවරය පිණිස පිළිපදීද, මනින්‍ද්‍රිය රකීද, මනින්‍ද්‍රියයෙහි සංවරයට පැමිණෙයිද, මහණෙනි, මෙසේ වනාහි භික්‍ෂු තෙම රකින්නේ වේ.

§2.4.. “මහණෙනි, කෙසේ නම් භික්‍ෂුව ඉවසන්නේ වේද?
මහණෙනි, මේ ශාසනයෙහි භික්‍ෂුව ශීත ඉවසන්නේ වේද, උෂ්ණය, සාද්‍රක, පිපාසය ඉවසන්නේ වේද ඩැහැ ලේ බොන මැස්සෝය, මදුරුවෝය, සුළඟය, අව්වය, සර්‍පය යන මොවුන්ගේ ස්පර්‍ශයන් ඉවසන්නේ වේද, නපුරුකොට කියන ලද, නපුරු සේ පැමිණියාවූ වචන පථයන් ඉවසන්නේ වේද, උපන්නාවූ ශරීරයෙහි හටගත්තාවූ, දුක්වූ, තියුණුවූ, රළුවූ, කටුකවූ, අමිහිරිවූ, අමනාපවූ, ප්‍රාණය හැරගන්නාවූ, වේදනාවන් ඉවසන ස්වභා ඇත්තේ වේද, මහණෙනි, මෙසේ භික්‍ෂු තෙම ඉවසන්නේ වේ.

§ 2.5. මහණෙනි, කෙසේ නම් භික්‍ෂුව යන්නේ වේද?
මහණෙනි, මේ ශාසනයෙහි භික්‍ෂුව තමන් මේ දීර්‍ඝවූ කාලයකින් නොගිය විරූ , සියලු සංස්කාරයන්ගේ සංසිඳීම ඇත්තාවූ, සියලු කෙළෙසුන්ගේ දුරලීම් ඇත්තාවූ, තෘෂ්ණාවගේ ක්‍ෂය කිරීම ඇත්තාවූ, විරාගවූ, නිරෝධවූ, නිර්වාණයයි යන දිශාවට ලුහු ලුහුවම යන්නේද, මහණෙනි, මෙසේ වූ භික්‍ෂුව යන්නේ වේ.

“මහණෙනි, මෙසේ ගුණඅඞඟ පසකින් යුක්තවූ භික්‍ෂුව පූජාවට සුදුසු වෙයි. දුර සිට ගෙනෙන ලද සත්කාරයට සුදුසු වෙයි. දක්‍ෂිණාවට සුදුසු වෙයි. ඇඳිලි කිරීමට සුදුසු වෙයි. ලෝකයාගේ උතුම් පින් කෙත වෙයි.

/

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න /  වෙනස් කරන්න )

Google photo

ඔබ අදහස් දක්වන්නේ ඔබේ Google ගිණුම හරහා ය. පිට වන්න /  වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න /  වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න /  වෙනස් කරන්න )

This site uses Akismet to reduce spam. Learn how your comment data is processed.